SUSANA CORBELLA EGILUZ (Bilbo, 1965), kulturgintzan urteetan aritutako laudioarrak, Arteterapia doaako tailer saioa eskainiko du larunbatean, azaroaren 11an, Laudioko Satya Yoga Eskolan.
Artean trebatuta egon behar dugu arteterapia tailer batean parte hartzeko?
Ez, ez da inolako trebetasunik behar. Arteterapia egiteak norberaren baliabideak erabiltzea du helburu eta bakoitzak bere gisara egitea proposatzen dugu.
Zer lor dezakegu proposatzen dituzun tailer saioetan?
Arteterapia oso ezezaguna da oraindik Euskal Herrian eta orain nire helburu nagusiena ezagutaraztea da. Saio batean ikus dezakezu artea norberaren barruko esperientziaren informazioa ateratzeko baliabide erraza dela. Musika, dantza eta plastikarekin esperientziaren bizipen berria ateratzen da, eta bide ezezagun batetik abiatzeko aukera jorratu ahal dugu. Gure barruko eta kanpoko gertaerekin disfrutatzeak eta adi egoteak sormenera eramaten gaitu.
Zein izan da arteterapia lantzera eraman zaituen ibilbidea?
Hasieran Arte Ederrak ikasi nuen eta psikologia ere nuen gustuko. Denborarekin Bartzelonan Arteterapia Masterra ikasi nuen eta orain nire lanbidea da.
Ni beti arteen bidetik ibili naiz eta interesatzen zaidan gauza garrantzitsuenetakoa pertsonaren jokabidea edo psikologia da. Biak batera eta elkarrizketan, Arteterapia sortzen da. Ez dut nire bizitza artista soil bezala ikusten. Aldiz, artea erabiliz jendea laguntzea oso atsegina eta gustukoa dut.
Orain zer motako lanak egiten dituzu?
Normalean Arteterapaia bi eratan erabiltzen dut: Sormen tailerrak egiteko edonorentzako eta beste alde batetik arazoak dituen jendearentzako, batez ere Alzheimer edota osasun mental alorreko bestelako patologiak dituztenentzako. Bilboko Sendarte izeneko elkartearekin lan egiten dut Arteterapia saioak egiten. Ume autistekin lan egiten dut ere eta Gorabide izeneko elkartearekin elbarritu psikikoekin aritu naiz. Psikologia esparruan orain erabiltzen den tresna hitza da, baina jende askorentzat hitza zuzenegia da… eta artea elkar ulertzeko tresna berezia dugu. Guzti honen inguruko informazio gehiago nire blogean irakur daiteke: https://xuxiart.wordpress.com/
El arte es para tod@s pero sólo una élite lo sabe 